اسلام آباد۔15دسمبر(اے پی پی)نگران وزیراعظم انوار الحق کاکڑ کشمیری عوام کوں یقین ݙیوائے جو پوری پاکستانی قوم انہاں دے حق خود ارادیت کیتے جدوجہد آزادی اچ انہاں دے نال کھڑی اے، کشمیریاں دی شمولیت دے بغیر یکطرفہ بھارتی اقدامات نال ایندی حیثیت اچ کوئی فرق نئیں پوندا، بھارت کوں ناکامی دا منہ ݙیکھݨا پوسی۔ اے جے کے ٹی وی کوں انتروی اچ انہاں آکھیا جو میں آزاد کشمیر دی قانون ساز اسمبلی اچ تنازعہ کشمیر تے پاکستان دا مؤقف پیش کیتے، کشمیری شہداء دا ساݙے تے قرض اے، کشمیر دے بغیر پاکستان دا تصور ممکن نئیں، کشمیر بین الاقوامی سطح تے منیا ہویا متنازعہ علاقہ اے اتے اقوام متحدہ دی سلامتی کونسل دے ایجنڈے تے غیر حل شدہ موجود اے، اقوام متحدہ دی قرارداداں دے مطابق ایندا ہکو حل استصواب رائے اے، پاکستان مسئلہ کشمیر ہمیشہ ہر فورم تے اڳونہا کریندا رہسی، حریت قیادت دے خلاف بھارتی مظالم دے باوجود کشمیریاں دی جدوجہد آزادی جاری رہسی اتے ٻئی تکڑی تھیسی، آزاد کشمیر حکومت نال رل تے کنٹرول لائن دے نیڑے مقیم کشمیریاں دے مسائل دے حل کیتے اقدامات کریسوں، اساں ٻئے زور نال مسئلہ کشمیر ہر بین الاقوامی فورم تے چیسوں، کشمیریاں دی جدوجہد آزادی کوں منطقی انجام تئیں پچیسوں۔
.jpg)
