اسلام آباد۔8اکتوبر (اے پی پی) قومی سلامتی کمیٹی ولوں ہک خودمختار، مستحکم اتے پرامن افغانستان دے پاکستان دے عزم دا اعادہ کریندیں ہوئیں عالمی برادری تے زور ݙتے جو او افغانستان اچ انسانی بحران نال نبڑݨ کیتے مدد کرے جڈانجو وزیراعظم عمران خان ہدایت کیتی جو افغانستان بارے کیتی ڳئی کوششاں کوں ہم آہنگ کرݨ کیتے خصوصی سیل ٻݨایا ونڄے۔ جمعے کوں قومی سلامتی کمیٹی دا 34 واں اجلاس وزیراعظم عمران خان دی صدارت اچ تھیا جئیں اچ افغانستان دی اڄوکی صورتحال تے ڳالھ مہاڑ کیتی ڳئی۔ اجلاس اچ وفاقی کابینہ دے متعلقہ ارکان، ساری سروسز چیفس اتے انٹیلیجنس اداریاں دے سربراہ شریک تھیے۔ وزیراعظم کوں علاقائی سلامتی دی صورتحال خصوصی طور افغانستان اچ تھیوݨ آلی پیشرفت اتے اوندے پاکستان تے ممکنہ اثرات تے تفصیلی بریفنگ ݙتی ڳئی۔ قومی سلامتی کمیٹی ولوں ہک خودمختار، مستحکم اتے پرامن افغانستان دے پاکستان دے عزم دا اعادہ کیتا۔ اجلاس اچ افغانستان دی عبوری حکومت نال تعمیری، سیاسی اتے اقتصادی ڳالھ مہاڑ بارے عالمی رابطیاں دی اہمیت تے روشنی پاتی ڳئی۔ وزیراعظم دی افغانستان بارے کیتی ڳئی کوششاں کوں ہم آہنگ کرݨ کیتے خصوصی سیل ٻݨاوݨ دی ہدایت کیتی۔
