اسلام آباد۔20دسمبر(اے پی پی)وزیراعظم دے مشیر امور کشمیر و گلگت بلتستان قمر زمان کائرہ آکھیے جو قوم کوں چنڳے مستقبل کیتے قومی عادات وٹاوݨیاں ہوسن اتے بچت پالیسی تے عمل کرݨا ہوسی، بلاول ہندوستان دے مسلماناں اتے ٻنھاں اقلیتاں دا مقدمہ اڳونہا کیتے، دہشتگردی دے خلاف آواز چاوݨ تے بھارت دے ݙیݙھ اچ مروڑ اٹھدے پن۔ وفاقی کابینہ اجلاس توں بعد میڈیا بریفنگ اچ انہاں آکھیا جو بلاول دے اقوام متحدہ اچ پاکستان، ایندی حکومت اتے عوام سودھا بھارت اچ مسلماناں اتے بنھاں اقلیتاں کیتے آواز چاتی اے، پاکستان دہشتگردی دے خلاف جنگ اچ وݙیاں قربانیاں ݙتن، پاکستان دا مقدمہ کتھائیں وی پچھو نا تھیوݨ ݙتا ویسی، اڄ وزیراعظم اتے کابینہ وزیر خزانہ دی جرات کوں سلام پیش کیتے۔ انہاں آکھیا جو ملک اوکھے معاشی حالات دا شکار اے، اینڄھے حالات اچ بچت پالیسی اپنائے بغیر کوئی راہ کائنی، حکومت اینڄھے اقدامات قوم دیاں تکلیفاں ݙیہدے ہوئے کریندی پئی اے اتے ایکوں مثبت انداز اچ ڳھدا ونڄے۔ قمر زمان کائرہ آکھیا جو اپوزیشن لیڈر عمران خان روز اپوزیشن تے اتے ملکی معیشت تے نواں حملہ کریندن، اینڄھے اقدامات نال ملک و قوم ݙوہیں دا نقصان اے، اینڄھی سوچ تے قوم کوں وی ریسپانس ݙیوݨا چاہیدے۔
