اسلام آباد۔21مئی (اے پی پی):وفاقی وزیر اطلاعات و نشریات مریم اورنگزیب آکھیے جو پاک چین یاری پوری دنیا اچ ھک مثال اے، سٹریٹجک پارٹنر شپ اتے سفارتی تعلقات توں پاک چین دی یاری شروع تھئی ، اقتصادی راہداری جیہے منصوبے پاکستان دے اندر اقتصادی خوشحالی اتے سٹریٹجک پارٹنر شپ سودھے خطے دے نینگراں تے آندیاں نسلاں کیتے معاشی ترقی اتے خوشحالی دا مظہر ہن۔ اے ڳالھ انہاں ہفتے کوں اتھاں پاک چین سفارتی تعلقات دے 71 سال مکمل تھیوݨ تے وزیراعظم دی خصوصی ہدایت تے چینی قونصلیٹ دے دورہ دے موقع تے تقریب توں خطاب کریندے ہوئیں آکھی ۔ ایں موقع تے انہاں وزیراعظم شہباز شریف دا خصوصی پیغام وی پڑھ تے سݨایا ۔ وفاقی وزیر اطلاعات آکھیے جو اڄ پاک چین سفارتی تعلقات دے 71 سال مکمل تھئن، اڄ ھک تاریخی ݙینھ اے ۔ پاکستان تے چین وچال تعلقات ایں سانڳے وی خاص اہمیت رکھیندن جو اے ݙوہیں ملکاں دے عوام توں شروع تھیندن ݙوہیں ملکاں دے عوام محبت تے لازوال ڳانڈھے اچ ڳھنڈیے پئن ، انہاں آکھیے جݙاں وی چین دا کوئی منصوبہ پاکستان اچ آندے تاں اساکوں یقین تھیندے جو اے ساݙے فیدے کیتے ہوسی ۔ وفاقی وزیر اطلاعات آکھیے جو کراچی اچ دہشت گردی دا ھک واقعہ تھیا ، ایجھے واقعات پاک چین تعلقات کوں سبوتاژ کرݨ دی کوشش ہن ، ایں واقعے توں بعد وزیراعظم شہباز شریف سکیورٹی اتے انفراسٹرکچر میکنزم دا نویں سروں جائزہ ڳھدا تے ایں ویلھے او سارے معاملات کوں خود مانیٹر کریندے پئن وفاقی وزیر اطلاعات آکھیے جو جݙاں کراچی دا واقعہ پیش آیا تاں وزیراعظم شہباز شریف ساری مصروفیات چھوڑ تے چینی قونصلیٹ آئے، وزیراعظم پاک چین تعلقات کوں سبوتاژ کرݨ دیاں کوششاں کوں ناکام بݨیندے ہوئیں سکیورٹی میکنزم کوں بحال کیتا۔ انہاں آکھیے جو ݙوہیں ملکاں دا آپت اچ سانجھا احترام اتے اعتماد دا رشتہ اے۔وفاقی وزیر اطلاعات پاک چین سفارتی تعلقات دے 71 سال مکمل تھیوݨ تے کیک وی کٹیا۔ ایں موقع تے وفاقی سیکریٹری اطلاعات شاہیرہ شاہد وی موجود ہن۔
