اسلام آباد۔26نومبر (اے پی پی) وزیراعظم محمد شہباز شریف اتے بیلاروس دے صدر الیگزینڈر لوکاشینکو وچال ݙوپاسہ ملاقات تھئی اے۔ ملاقات اچ ݙوہیں رہنماواں آپسی فیدہ تعاون اتے اقتصادی تے تجارتی تعلقات ودھاوݨ دا عزم کیتا۔ منگل کوں وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف وزیراعظم ہاؤس آوݨ تے بیلا روس دے صدر لوکا شینکو دا خیر مقدم کیتا۔ صدر لوکا شینکو پاکستان اچ پر تپاک استقبال اتے میزبانی تے وزیراعظم دا شکریہ ادا کیتا۔ ایں موقع تے وزیراعظم آکھیا جو پاکستان بیلاروس نال آپݨے تعلقات کوں قدر نال ݙیکھدے۔ ݙوپاسہ ملاقات اچ سیاسی تعلقات، تجارت اتے سرمایہ کاری، دفاعی تعاون اتے علاقائی مسئلیاں سودھے مختلف موضوعات تے ڳالھ مہاڑ کیتی۔ وزیراعظم بیلا روس دے صدر کوں حکومت پاکستان دی برآمدات دی نمو اتے دوست ملکاں نال سرمایہ کاری راغب کرݨ دے ذریعے پاکستان دی اقتصادی بحالی دی پالیسی بارے ݙسیا۔ ݙوہیں رہنماواں عالمی اتے علاقائی پیش رفت تے وی ڳالھ کیتی ڳئی۔
