اسلام آباد۔21ستمبر(اے پی پی) نگران وفاقی وزیر اطلاعات و نشریات مرتضیٰ سولنگی آکھیے جو الیکشن کمیشن دی طرفوں انتخابات دی تاریخ دا اعلان خوش آئند اے، افواہیں کھنڈاوݨ آلیں کیتے اڄ مایوسی دا ݙینھ اے ، اساکوں خوشی اے جو ملک اچ آئین دے تحت انتخابات تھیندے پئن ۔ نگران وفاقی وزیر نجکاری فواد حسن فواد دے رلے پریس کانفرنس توں خطاب کریندے ہوئیں انہاں آکھیے جو آئین پاکستان دے تحت ایں ملک کوں ایندے منتخب نمائندے چلیسن ۔ انہاں آکھیے انتخابات دے حوالے نال الیکشن کمیشن 30 نومبر تئیں سارے کم مکمل کر گھنسی جݙاں جو الیکشن ایکٹ 2017ءدے تحت ساریاں سیاسی جماعتاں کوں انتخابی مہم کیتے 54 ݙینھ ݙتے ویسن انہاں آکھیے الیکشن کمیشن موجب جنوری دے چھیکڑی ہفتے اچ انتخابات تھیسن، جیڑھا جو ھک وݙی خبر اے ۔ انہاں آکھیے اساکوں خوشی اے جو ملک اچ آئین دے تحت انتخابات تھیسن ۔ انتخابات دے انعقاد توں ملک اچ معاشی ترقی و سیاسی استحکام اچ ودھارا تھیسی ۔
