لاہور ۔27دسمبر(اے پی پی)نگران وفاقی وزیر اطلاعات، نشریات و پارلیمانی امور مرتضیٰ سولنگی آکھیے جو موسمیاتی تباہی ہک وݙا چیلنج اے، ملکی چیلنجز تے قابو پاوݨ کیتے علم و تحقیق ٻہوں ضروری اے، علم دے حصول نال ہی ملک ترقی کر سڳدے۔ اے ڳالھ انہاں لاہور اچ انفارمیشن ٹیکنالوجی یونیورسٹی پنجاب دے چوتھے کانووکیشن نال خطاب اچ آکھی۔
گورنر پنجاب بلیغ الرحمان، وائس چانسلر آئی ٹی یو پروفیسر ڈاکٹر عدنان نور، مختلف جامعات دے وائس چانسلرز، ڈینز، فیکلٹی ممبران اتے طلبا و طالبات دی وݙی تعداد کانووکیشن اچ موجود ہن۔ وفاقی وزیر اطلاعات آکھیا جو پاکستان کوں غیر معمولی چیلنجز جیندے اچ معاشی بدحالی، عدم برداشت اتے پرتشدد رویاں تے قابو پاوݨ دی لوڑھ اے، ایں سانڳے تعلیم و تحقیق تے توجہ ݙیوݨی ہوسی، قدرتی ماحول دے تحفظ کیتے اپݨا کردار ادا کرݨا ہوسی۔
نگران وفاقی وزیر آکھیا جو سوشل میڈیا تے غلط پروپیگنڈا کھنݙاوݨ دا مقابلہ کرݨا ہوسی۔ کانووکیشن اچ 524 طلبا و طالبات کوں ڈگریاں ݙتیاں ڳں ڄݙاں جو 5 طلبا کوں پی ایچ ڈی اتے 16 طلبا و طالبات کوں گولڈ میڈل ݙتے ڳن۔
