اسلام آباد۔12اپریل (اے پی پی) وزیراعظم شہبازشریف آکھیا جو اقتصادی چیلنجز توں نکلݨ کیتے ہنگامی بنیاداں تے معاشی تجویزاں ٻݨائی ونڄن۔ منگل کوں وزیراعظم آفس دے میڈیا ونگ ولوں جاری بیان دے مطابق وزیراعظم ہدایت کیتی جو اے تجویزاں زراعت، صنعت، سرمایہ کاری، بینکاری، تاجر تے کاروباری برادری سودھے سارے متعلقہ طبقات دی آراء دی روشنی اچ بݨائی ونڄن۔ ایں بارے کجھ ݙینھ اچ سمٹ کراوݨ دا فیصلہ وی کیتا ڳئے۔ بیان دے مطابق حکومت نیشنل اکنامک کونسل ٻݨاوݨ دا فیصلہ کیتے۔ اے کونسل غیر جانبدار اتے ممتاز معاشی ماہرین تے مشتمل ہوسی۔ وزارت عظمی دا منصب باضابطہ سنبھالݨ دے بعد وزیراعظم دی صدارت ہنگامی اجلاس اچ معاشی ماہرین کوں سفارشات ٻݨاوݨ دا حکم ݙے ݙتے۔ سیکریٹری خزانہ ، اجلاس اچ ملکی معاشی صورتحال، ریونیوز، بجٹ خساراں، داخلی اتے ٻاہرلے قرض دی صورتحال سودھے مجموعی قومی بیلنس شیٹ بارے تفصیلی بریفنگ ݙتی۔
