اسلام آباد۔29اگست (اے پی پی):صدر مملکت ڈاکٹر عارف علوی کوں جرمنی، سپین، بلجیئم ، لیبیا، کینیا اتے ایتھوپیا دے نامزد سفیراں ایوان صدر اچ منعقد ھک تقریب اچ آپݨیاں سفارتی سنداں پیش کیتیاں ، ایوان صدر دے پریس ونگ توں جاری بیان موجب صدر مملکت نال پاکستان اچ جرمنی دے سفیرالفریڈ گریناس، سپین دے سفیر جوز انتونیا دی اورے پرل، بیلجیئم دے سفیر چارلس ڈیگلون، لیبیا دے سفیر معمر زیدو عبدالمطلب، کینیا دے ہائی کمشنر میری نیمبورا کماؤ اتے ایتھوپیا دے سفیر جمال بکر عبداللہ انڄ انڄ ملاقاتاں کیتن ۔ صدر مملکت ڈاکٹر عارف علوی جرمنی دے سفیر نال ڳالھ کریندے ہوئیں آکھیے جو جرمنی پاکستان اچ سرمایہ کاری کرݨ آلے وݙے ملکاں اچوں ھک اے ، ہوا، شمسی توانائی تے ہائیڈل پاور پراجیکٹس اچ مہارت رکھݨ آلیاں جرمن کمپنیاں انہاں شعبیں اچ موجود مواقع تے مراعات توں فیدہ چا سڳدن ، انہاں آکھیے جوجرمن سرمایہ کار سی پیک دے تحت پاکستان دے خصوصی اقتصادی زونز اچ سرمایہ کاری کرن، صدر مملکت نال پاکستان اچ سپین دے نویں سفیر وی ملاقات کیتی ، صدر مملکت آکھیے جو پاکستان تے سپین وچال اقتصادی، تجارتی، سرمایہ کاری اتے سیاحت دے شعبیں اچ تعلقات کوں ودھاوݨ دی لوڑھ اے ، صدر مملکت جی ایس پی پلس سکیم تے پاکستان کیتے سپین دی حمایت دی تعریف کیتی ۔ صدر مملکت نال بیلجیئم دے نامزد سفیر وی ملاقات کیتی۔ صدر مملکت آکھیے جو تجارتی وفد دے تبادلیں، تجارتی میلی اچ شرکت تے مشترکہ منصوبیں توں تجارتی تعاون ودھایا ونڄ سڳدے ، پاکستان تے بیلجیئم وچال ݙوطرفہ تجارتی حجم کوں 1.35 ارب ڈالر دی موجودہ سطح توں مزید ودھاوݨ دی لوڑھ اے ، بعد اچ صدر مملکت عارف علوی نال پاکستان اچ لیبیا دے نویں سفیر وی ملاقات کیتی۔ ڈاکٹر عارف علوی آکھیے جو پاکستان تے لیبیا وچال تجارتی تعلقات کوں ودھارا ݙیوݨ ، اقتصادی تعاون دے نویں رستے ڳولݨ دی لوڑھ اے ، امید اے جو 11 سال دے وقفے توں بعد تعینات تھیوݨ آلے نویں سفیر برادر ممالک دے درمیان تعلقات کوں مزید ودھارا ݙیسں ۔ صدر مملکت نال پاکستان اچ کینیا دے سفیر وی ملاقات کیتی۔ ایں توں بعد صدر مملکت نال پاکستان اچ ایتھوپیا دے سفیر وی ملاقات کیتی۔ صدر مملکت ایتھوپیا دی طرفوں اسلام آباد اچ سفارتی مشن کھولݨ دے فیصلے دی تعریف کیتی
