اسلام آباد – 22 – سيپٽمبر (اي پي پي) اطلاعات ۽ نشريات واري وفاقي وزير چوڌري فواد حسين چيو آهي ته نيوزي لينڊ ڪرڪيٽ ٽيم کي ڏني ويندڙ ڌمڪي جا پيرا ڀارت مان مليا آهن، احسان الله احسان نالي جعلي فيس بڪ اڪائونٽ سان نيوزي لينڊ کي پاڪستان جي دوري کان روڪڻ جي ڌمڪي ڏني وئي، اها جعلي آءِ ڊي ڀارت مان جنريٽ ٿي، سنڊي گارڊين نيوزي لينڊ ٽيم جي دوري جي خلاف ڌمڪي آميز آرٽيڪل لکيو، نيوزي لينڊ جي اوپنر مارٽن گپٽل جي گهرواري کي به ڌمڪي آميز ميل موڪلي وئي، نيوزي لينڊ جي ٽيم کي به جيڪي ڌمڪيون ڏنيون ويون انهن جو ڳڙهه ڀارت هو، نيوزي لينڊ جو درو رد ڪرائڻ جو مقصد پاڪستان کي شرمنده ڪرڻ هو، ڀارت جيتري مرضي ڪوشش ڪري وٺي، ان کي ناڪامي جو منهن ڏسڻو پوندو، آءِ سي سي نيوزيلينڊ ۽ ٻين ٽيمن جي پاڪستان جي دوري جي حوالي سان ملندڙ ڌمڪين جو نوٽيس وٺي، پي سي بي ۽ حڪومت نيوزي لينڊ جو دورو رد ٿيڻ تي رد عمل ڏيندا، سمورن عالمي ڪرڪيٽرز جو ٿورو ادا ڪريون ٿا جيڪي ان مشڪل وقت ۾ پاڪستان سان گڏ بيٺا. اهڙن خيالن جو اظهار هن گهرو وزير شيخ رشيد احمد سان گڏ پريس ڪانفرنس کي خطاب ڪندي ڪيو. اطلاعات واري وفاقي وزير چيو ته پاڪستان کي ففٿ جنريشن هائبرڊ وار ۽ ميڊيا وار درپيش آهي، جڏهن تحريڪ لبيڪ جي تحريڪ هلي رهي هئي ان کي هندستان مان سپورٽ ملي، سوشل ميڊيا وار فيئر قائم ڪيو ويو، ٽوئيٽس ٿيا، تحريڪ لبيڪ ۾ ماڻهن پنهنجي عقيدي ۽ احترام جي ڪري شامل ٿيا پر اهو ڪهڙي طريقي سان استعمال ٿيا ان جو کين خبر ئي نه پئي، هن چيو ته نيوزي لينڊ ڪرڪيٽ ٽيم جو جڏهن دورو رد ٿي رهيو هو ان وقت ايس سي او جو سربراهي اجلاس جاري هو، وزيراعظم جي تقرير ٿيڻ واري هئي، تقرير کان تقريبن 15 منٽ پهرين مون کي اهو پيغام مليو ته نيوزي لينڊ جي ٽيم دورو رد ڪري رهي آهي، پرڏيهي وزير شاهه محمود قريشي، قومي سلامتي جو صلاحڪار معيد يوسف ۽ وزيراعظم جي پرسنل اسٽاف سان گڏجي اسان مشورو ڪيو ته چيو ته اها خبر وزيراعظم کي ان جي تقرير کانپوءِ ڏني ويندي ته جيئن سندس تقرير ۾ ڪنهن قسم جو ڪو خلل نه پوي، ان مان اندازو لڳائي سگهجي ٿو ته اها صورتحال پاڪستان ۽ ان جي عوام جي لاءِ ڪيتري مشڪل هئي. نيوزيلينڊ جو دورو رد ٿيڻ سان پاڪستان جي ماڻهن ۾ غم ۽ ڪاوڙ هئي، ڪيترائي ماڻهو ناراض آهن، وفاقي وزير دورو ختم ڪرڻ جي حوالي سان ڪجهه حقيقتون پيش ڪندي چيو ته 19 آگسٽ 2021ع تي احسان الله احسان جي نالي سان هڪ جعلي فيس بڪ آءِ ڊي ٺاهي وئي جنهن سان هڪ فيس بڪ پوسٽ ڪئي وئي جنهن ۾ چيو ويو ته ”نيوزي لينڊ ڪرڪيٽ بورڊ ۽ نيوزي لينڊ جي حڪومت ڪرڪيٽ ٽيم کي پاڪستان نه موڪلي، ڇو ته سيڪيورٽي صورتحال پاڪستان ۾ بهتر نه آهي، جيئن ته خبر آهي ته داعش پاڪستان ۾ وڏا ٽارگيٽ تلاش ڪري رهي آهي تنهن ڪري اهو ٽارگيٽ نيوزي لينڊ جي ڪرڪيٽ ٽيم به ٿي سگهي ٿي، هو پنهنجي موجودگي ظاهر ڪرڻ ۽ ميڊيا جو ڌيان حاصل ڪرڻ لاءِ اهڙو قدم کڻي سگهي ٿي. آئون ڄاڻان ٿو ته داعش ان پوسٽ کانپوءِ مون کان ناراض ٿيندي پر مون کي ڪرڪيٽ پسند آهي ۽ آئون راند جي حق ۾ نه آهيان، مون کي جيڪو چوڻو هو اهو چئي ڇڏيو، هاڻي اها نيوزيلينڊ ڪرڪيٽ ٽيم جو ڪم آهي ۽ نيوزي لينڊ جي حڪومت کي سنجيدگي سان سوچڻ گهرجي. احسان الله احسان ٽي ٽي پي جو اڳوڻو ترجمان.“ اطلاعات واري وفاقي وزير ٻڌايو ته پهرين پوسٽ 19 آگسٽ 2021ع تي فيس بڪ تي آئي، ان کانپوءِ 21 آگسٽ 2021ع تي ڀارتي اخبار سنڊي گارڊين جي بيورو چيف ابي نندن مشرا هڪ آرٽيڪل شايع ڪيو جنهن ۾ چيو ويو ته نيوزيلينڊ ڪرڪيٽ ٽيم کي پاڪستان ۾ دهشتگرد حملي کي منهن ڏيڻو پئجي سگهي ٿو، اهو آرٽيڪل احسان الله احسان جي فيڪ پوسٽ جي بنياد تي لکيو ويو، ابي نندن مشرا سنڊي گارڊين انڊيا جي بيورو چيف آهي ۽ سندس ڪيترائي مضبوط لنڪ امر الله صالح سان ملندا آهن جيڪو افغانستان جو اڳوڻو اين ايس اي رهيو آهي. وفاقي وزير فواد چوڌري چيو ته 19 آگسٽ تي پوسٽ اچي ٿي، 21 آگسٽ تي هندستان ۾ آرٽيڪل لکيو وڃي ٿو ته نيوزي لينڊ جي ڪرڪيٽ ٽيم کي خطرو درپيش آهي، 24 آگسٽ 2021ع تي نيوزي لينڊ جي اوپنر مارٽن ڪپٽل جي گهرواريءَ کي تحريڪ لبيڪ جي هڪ اي ميل آءِ ڊي تان ڌمڪي آميز اي ميل وڃي ٿي، جنهن ۾ چيو وڃي ٿو ته مارٽن ڪپٽل کي پاڪستان ۾ قتل ڪيو ويندو، ٽوٽن ميل تي اها اي ميل آءِ ڊي 24 آگسٽ 2021ع تي رات هڪ لڳي 5 منٽن تي ٺاهي وئي، صبح 11 لڳي 59 منٽن تي ان اي ميل تان مارٽن ڪپٽل جي گهرواريءَ کي اي ميل ڪئي وئي، ان اي ميل اڪائونٽ تان هن وقت تائين صرف هڪ ئي اي ميل جنريٽ ٿي جيئن ته اها اي ميل آءِ ڊي ٽوٽن ميل تي ٺاهي وئي، جيڪا سيڪيور ميل سروس آهي، ان جا تفصيل دستياب ناهن ٿيندا، اسان انٽرپول کي درخواست ڪئي آهي ته هو ان اي ميل آءِ ڊي جا تفصيل اسان کي فراهم ڪري ۽ ٻڌائي ته اها اي ميل ڪيئن ٺهي، هن ٻڌايو ته انهن سڀني واقعن جي باوجود نيوزيلينڊ ٽيم پنهنجو دورو رد نٿي ڪري، 11 سيپٽمبر تي نيوزيلينڊ جي ڪرڪيٽ ٽيم پاڪستان جي دوري تي پهچي وڃي ٿي، جڏهن ته ٽي 20 جا ميمبر 12 سيپٽمبر تي پاڪستان پهچن ٿا، انهن کي گهروزارت پاران ڀرپور سيڪيورٽي فراهم ڪئي وئي، انهن جو پورو پروگرام جاري ڪيو ويو، ٻه هيليڪاپٽر سيڪيورٽي تي لڳايا ويا، پريڪٽس سيشن به ٿيا، 13 سيپٽمبر تي نيوزي لينڊ جي ٽيم سرينا هوٽل کان راولپندي اسٽيڊيم پهتي، اتي پاڪستان ڪرڪيٽ ٽيم به موجود هئي، ٻنهي ٽيمن پريڪٽس سيشن ڪيا، نيوزيلينڊ جي سيڪيورٽي ادارن ۽ اسان جي سڀني سيڪيورٽي ادارن به انهن ٿريٽس کي فيڪ قرار ڏنو، 13 سيپٽمبر تي منجهند چار وڳي کان شام ساڍا 7 وڳي راولپنڊي ڪرڪيٽ اسٽيڊيم ۾ پريڪٽس سيشن ٿيا، ڪو به ٿريٽ الرٽ رپورٽ نه ٿيو، ٽيمون اتان واپس آيون، اڳئين ڏينهن وري ٽيم واپس اسٽيڊيم وئي، پوءِ 3 ڪلاڪ پريڪٽس ڪئي، ان کان اڳئين ڏينهن موڪل هئي ۽ پوءِ ميچ کان هڪ ڏينهن پهرين پريڪٽس سيشن ٿيو، ڪنهن به قسم جو ڪو به ٿريٽ نه هو، هن ٻڌايو ته ميچ کان اڳ 17 سيپٽمبر تي نيوزي لينڊ خواهش ظاهر ڪئي ته اسان اهو دورو پنهنجي حڪومت جي هدايت تي ختم ڪري رهيا آهيون، ان کانپوءِ گهرو وزارت جي سيڪيورٽي ٽيم پي سي بي جي ٽيم ۽ اسلام آباد انتظاميه ۽ ايجنسين جا ماڻهو ان وٽ ويا ۽ انهن کي درخواست ڪئي ته توهان کي ٿريٽ آهي ته اسان سان شيئر ڪيو، نيوزي لينڊ جي سيڪيورٽي ٽيم به اتي موجود هئي، اها به اسان جي ماڻهن وانگر ٿريٽ کان لاعلم هئي، بحرحال نيوزي لينڊ جي ٽيم دورو ختم ڪري ڇڏيو، وزيراعظم کي ايس سي او سربراهه اجلاس جي تقرير کانپوءِ ٻڌايو ويو ۽ ان کي درخواست ڪئي ته هو نيوزي لينڊ جي وزيراعظم سان ڳالهائي، هن نيوزي لينڊ جي وزيراعظم کي ٻڌايو ته جيڪڏهن هن وقت دورو ختم ٿيندو ته پاڪستان جي ماڻهن ۾ ڏک ۽ ڪاوڙ ٿيندي، جنهن تي نيوزيلينڊ جي وزيراعظم چيو ته ان وٽ ڪريٽيڪل انفارميشن آهي، نيوزي لينڊ جي ٽيم کي ٽارگيٽ ڪيو ويندو ان تي اهو دورو ختم ٿي ويو، ٽيم واپس هلي وئي، 18 سيپٽمبر 2021ع تي انٽرپول ولنگٽن انٽرپول اسلام آباد کي حمزا آفريدي جي نالي سان هڪ پوسٽ جي باري ۾ ٻڌايو جيڪا نيوزيلينڊ جي وقت موجب 6 لڳي 25 منٽ ۽ پاڪستاني وقت موجب 17 سيپٽمبر رات 11 لڳي 25 منٽن تي ڪئي وئي، جنهن ۾ نيوزيلينڊ ڪرڪيٽ ٽيم کي ڌمڪي ڏني وئي ته انهن دورو ڪري غلطي ڪئي آهي، اي ميل جو جائزو ورتو ويو ته اها اي ميل آءِ ڊي جي ٺاهڻ جي 15 منٽن کانپوءِ ان تان هڪ اي ميل موڪلي وئي جڏهن اسان ان اي ميل جي جاچ ڪئي ته اها اي ميل ڀارت سان تعلق رکندڙ هڪ ڊوائيس تان موڪلي وئي، جنهن ۾ بي پي اين جو استعمال ڪري هنڌ تبديل ڪري سنگاپور ڪيو ويو، جنهن ڊوائيس تان اها اي ميل موڪلي وئي ان تي 13 وڌيڪ آءِ ڊيز آهن، جيڪي سڀئي هندي نالن تي ٻڌل آهن، ان ڊوائيس تي موجود 12 ٻيون آءِ ڊيز انڊين ۽ هندي نالن تي مشتمل آهن، سڀئي اي ميل هندي فلم انڊسٽري ۽ ٻين ڊرامن ۽ فلمن جي نالن تي ٺهيل هيون، صرف هڪڙو نالو حمزا آفريدي انهن کان مختلف هو جيڪو اهو ظاهر ڪرڻ لاءِ ٺاهيو ويو ته اها اي ميل پاڪستان مان جنريٽ ٿي آهي ۽ ڄاڻي واڻي حمزه آفريدي جو نالو استعال ڪيو ويو ته جيئن پاڪستان ۾ دهشتگردي جي خطري کي ظاهر ڪيو وڃي، هن ٻڌايو ته اي ميل جي لاءِ استعمال ٿيندڙ موبائيل ڊوائيس 2019ع ۾ ڀارت ۾ لانچ ٿي، موبائيل سم 25 سيپٽمبر 2019ع تي اوم پرڪاش مشرا جي نالي تي رجسٽرڊ ٿي، ان جي يوزر جي به تصديق ٿي چڪي آهي، اوم پرڪاش مشرا ممبئي مهاراشٽر کان حمزا آفريدي جي فيڪ آءِ ڊي استعمال ڪئي، گهرو وزارت ان تي هڪ ايف آءِ آر داخل ڪري رهي آهي، انٽرپول سان به رابطو ڪيو آهي، اهو سڄو ٿريٽ ويسٽ انڊيز جي ٽيم کي ڏنو ويو آهي، ان ٿريٽ ۾ به احسان الله احسان جي نالي سان آءِ ڊي استعمال ڪئي وئي آهي، ان آءِ ڊي ۾ احسان الله کانپوءِ ”احشان“ لکيو آهي، ان کان ڀارت جي ڳالهائڻ واري زبان جو اندازو لڳائي سگهجي ٿو، اطلاعات واري وفاقي وزير چيو ته بدقسمتي سان اهو صرف پاڪستان جي خلاف مهم نه پر عالمي سطح تي ڪرڻ واري سازش آهي، عالمي ادارا خاص طور آءِ سي سي کي اهڙي طرح جي واقعن جو نوٽيس وٺڻ گهرجي، ٿريٽس ڀارت کان ڏنا ويندا آهن، هڪ سوال جي جواب ۾ اطلاعات واري وفاقي وزير چيو ته اسان نيوزي لينڊ جي حڪومت کي چئي رهيا آهيون ته انهن کي جيڪو ٿريٽ جاري ٿيو آهي اهو اسان سان شيئر ڪن، پرڏيهي وزير آمريڪا به ان تي ڳالهه ٻولهه ڪئي آهي، هن ان تي شديد احتجاج ڪيو آهي، اسان کي يقين آهي ته نيوزيلينڊ جي ٽيم انهن واقعن کانپوءِ پنهنجو موقف ڏيندي، جيستائين برطانيه جو تعلق آهي ان جو سفير واضح ڪري چڪو آهي ته برطانيه جي ايڊوائيزي پاڪستان جي باري ۾ تبديل ناهي ٿي رهي، هن پاڪستان کي گرين لسٽ ۾ ئي رکيو آهي، برطانيه جي حڪومت ۽ سيڪيورٽي ايجنسين کي پاڪستان جي اندر خدشن تي ڪو به اعتراض نه آهي ته انگلش ڪرڪيٽ بورڊ جا اعتراض سمجهه کان مٿانهون آهن اهو وڏو ڪمزور بهانو آهي، اسان پي ٽي وي کي ٿيندڙ نقصان جو اندازو لڳائي رهيا آهيون، اسان جي قانوني ٽيم اجازت ڏني ته اسان اهو معاملو کڻنداسين، هڪ سوال جي جواب ۾ هن چيو ته ايف آءِ اي ان معاملي تي ايف آءِ آر داخل ڪري ورتي آهي، ان ۾ انٽرپول به شامل آهي، پي سي بي پرڏيهي وزارت ۽ گهرو وزارت پنهنجي پنهنجي سطح تي ڳالهه ٻولهه ڪنديون. هڪ ٻي سوال جي جواب ۾ هن چيو ته ٿريٽ ۽ ٿريٽ ايڊوائيزري ۾ فرق هوندو آهي، پنجاب حڪومت ايڊوائيزري جاري ڪئي ته ٻه وڏا ايونٽ ٿي رهيا آهن، هن پنهنجي ايڊوائيزري ۾ نيوزيلينڊ جي ميچ ۽ امام حسين جي چاليهي جو ذڪر ڪيو آهي، پنجاب حڪومت ٿريٽ نه پر ايڊوائيزري جاري ڪئي هئي ته جيئن مقامي پوليس ۽ اٿارٽيز پنهجو پاڻ کي تيار رکن، اطلاعات واري وفاقي وزير چيو ته هو ان سڄي صورتحال ۾ انهن سڀني ڪرڪيٽرن جو ٿورو ادا ڪري ٿو جيڪي پاڪستان سان گڏ بيٺا، سڄي دنيا مان ڪرڪيٽ سان محبت ڪندڙ ماڻهن پاڪستان ڪرڪيٽ بورڊ ۽ حڪومت جي لاءِ نيڪ خواهشن جو اظهار ڪيو آهي. هن چيو ته اهڙا ٿريٽس ايندا رهندا آهن انهن کي پهرين به ناڪام بڻايو آهي، ڀارت جيتري مرضي فنڊنگ ڪري ان کي ناڪامي جو منهن ڏسڻو پوندو.
