اسلام آباد۔22مئی (اے پی پی):وفاقی وزیر قانون، انصاف و پارلیمانی امور سینیٹر اعظم نذیر تارڑ آکھیے پارلیمنٹ سودھے سارے اداریں دا ساریں تے احترام لازم اے ۔ حکومت دی سنجیدگی تے کوئی شک نی کرݨا چاہیدا ، عوام کوں مہانگ توں نجات ݙیواوݨ سانڳے اساکوں رل تے کم کرݨا چاہیدے ۔ سینیٹ اجلاس اچ ڳالھ کریندے ہوئیں وفاقی وزیر اعظم نذیر تارڑ آکھیے پی ٹی آئی دے رہنما رؤف حسن تے حملے دی تحقیقات تھیندیاں پئن تے وختی ایندی رپورٹ منظر عام تے آویسی ۔ انہاں جیڑھی ایف آئی آر درج کرائی اے ایں تے من و عن عمل کیتا ویسی ۔عام حالات اچ اقدام قتل دی دفعات ایجھیاں کاروائیاں اچ نی لاتی ویندی لیکن ایں کیس اچ اقدام قتل دی دفعات وی شامل ہن کیوں جو اے نہ تھیوے کل اپوزیشن اینکوں ایشو بݨاوے ۔ انہاں آکھیے ہݨ تئیں جتنی معلومات کٹھی تھئی اے ایں موجب ٹرانس جینڈر انہاں تے حملہ کیتے ۔ ایں تے مزید تحقیقات جاری ہن۔ انہاں آکھیے حکومت دی سنجیدگی تے کوئی شک نی کرݨا چاہیدا اداریں دا احترام ساریں تے لازم اے ۔عدلیہ دے حوالے نال تبصرے درست کائنی۔ انہاں آکھیے ڳالھ دلیل نال کیتی ونڄے تاں سارے مسئلے مک ویسن ، پارلیمان سپریم ادارہ اے ایں ادارے دا احترام ساریں تے لازم اے ۔
