اسلام آباد۔15مارچ (اے پی پی)وزیراعظم محمد شہباز شریف آکھیا جو وفاقی حکومت قومی اسمبلی دے عام انتخابات ویلھے تے کراوݨ کیتے اپݨی آئینی ذمہ واری پوری کریسی۔ آئی ایم ایف نال گزریل حکومت آئینی اتے جمہوری طریقہ نال اپݨی حکومت دا خاتمہ تھیندا ݙیکھ تے پھر ڳے، اساں ایں معاہدے دی پاسداری کیتی اتے توقع اے جو اے معاہدہ جلدی تھیسی۔ بدھ کوں سی پی این ای دے وفد نال ڳالھ مہاڑ کریندیں ہوئیں وزیراعظم آکھیا جو آئی ایم ایف نال گزریل حکومت معاہدہ کیتا اتے جئیں ویلھے جنوری، فروری اچ انہاں کوں پتہ لڳیا جو انہاں دے خلاف آئینی اتے قانونی طریقے نال انہاں کوں ہٹایا ویندا پے توں اپݨے معاہدے توں پھر ڳے۔ اے کوئی نجی معاہدہ کائنا ہئی بلکہ پاکستان دی ریاست دا آئی ایم ایف نال معاہدہ ہئی۔ ایں انحراف نال جیڑھا نقصان تھیے او ساریاں دے سامھے اے اتے ہݨ ایجھی شرطاں جیڑھی گزریل حکومت منی ہن ہݨ آئی ایمف ایف آکھیا جو انہاں تے من و عن عمل کریسوں اتے ایندے باقاعدہ جائزہ ڳھنݨ دی ڳالھ کیتی اے۔ انہاں آکھیا جو اساکوں اے ڳالھ منݨٰی پی اے اتے ہݨ اساکوں امید اے جو سٹاف لیول تے معاہدہ جلدی تھی ویسی اتے ولا او بورڈ ݙے ویسی۔ انہاں آکھیا جو اساݙی 11 مہینے دی حکومت اے تاثر ہئی جو اے اتحادی حکومت شہباز شریف نی چلا سڳیے پر سارے اتحادیاں دے مثبت کردار پاروں اے حکومت قائم اے۔ انہاں آکھیا جو حکومت اوکھے حالات اچ فیصلے کیتن، کفایت شعاری تے اجتماعی دانش نال فیصلہ کیتا ڳے جئیں تے فوری کابینہ کمیٹٰی ٻݨائی ڳی جئیں دےترائے اجلاس تھی ڳن، آندا اجلاس میں آپ چیئر کریساں۔ حکومت سنجیدگی نال انہاں تجویزاں تے عمل کریسی۔ انہاں آکھیا جو پاکستان دی تاریخ دا ساریاں توں وݙا چھل آیا وفاقی حکومت خالصتاً اپݨے وسائل نال شفافیت دے نال بے نظیر انکم سپورٹ پروگرام اتے اینڈی ایم اے دے ذریعے چھل متاثرین کیتے سو ارب روپے خرچ کیتے۔ اساں ہر ڄاہ ڳیسے۔ جنیوا اچ متاثرین کیتے تھیوݨ آلی ڈونرز کانفرنس دے اعلانات کوں عملی جامہ پواوݨ کیتے کوشاں ہیسے۔
