اسلام آباد۔20اگست (اے پی پی) وزیراعظم محمد شہبازشریف آکھیا جو پاکستان ایجوکیشن اینڈاؤمنٹ فنڈ ٻݨݨ نال غریب گھراں دے ٻال اعلیٰ تعلیم حاصل کر سڳسن، فنڈ اچ بلوچستان دے نینگراں کیتے 20 فیصد کوٹہ رکھیا ڳئے۔ وزیراعظم آفس دے میڈیا ونگ توں جاری بیان موجب اے ڳالھیں انہاں پاکستان توں تعلق رکھݨ آلے یو کے دی معروف یونیورسٹی آف آکسفورڈ اچ آکسفورڈ یونین دے نو منتخب صدر اسرار خان کاکڑ نال ڳالھ مہاڑ کریندیں ہوئیں آکھی جنہاں منگل کوں انہاں نال ملاقات کیتی۔ وزیراعظم اسرار خان کاکڑ کوں ٻاہرلے ملک پاکستان دا ناں روشن کرݨ تے تعریف کیتی۔ وزیراعظم آکھیا جو میکوں امید اے جو اسرار کاکڑ اتے انہاں سویں صلاحیت مند پاکستانی نینگر اینویں بین الاقوامی سطح تے ملک دا ناں روشن کریندے رہسن۔ بلوچستان دے پسماندہ علاقے توں تعلق رکھݨ آلے نینگر دا محنت نال آپݨے سارے تعلیمی مرحلے اچ وظیفے ڳھنݨ اتے آخرکار آکسفورڈ یونین سویں اعلیٰ تنظیم دا صدر منتخب تھیوݨ فخر دی ڳالھ اے۔ پاکستان ایجوکیشن اینڈاؤمنٹ فنڈ ٻݨ ڳئے۔ پاکستان ایجوکیشن اینڈاؤمنٹ فنڈ ٻݨݨ نال غریب گھراں دے ٻال اعلیٰ تعلیم حاصل کر سڳسن، فنڈ اچ بلوچستان دے نینگراں کیتے 20 فیصد کوٹہ رکھیا ڳئے۔ملاقات اچ اسرار خان کاکڑ وزیراعظم کوں آکسفورڈ یونین اچ خطاب کرݨ دی دعوت ݙتی۔ اسرار کاکڑ نینگراں کوں بااختیار ٻݨاوݨ اتے ترقی دے ہکو سویں موقع ݙیوݨ دے اقدامات تے وزیراعظم کوں خراج تحسین پیش کیتا۔ انہاں آکھیا جو مئیں سودھے پاکستان دا ہر نینگر پاکستان دی ترقی تے خوشحالی کیتے خدمت کیتے تیار اے۔
